bletter gheiä und i gheiä mit,
la mi la tribä mit em wind wines chlises ching,
weiss nid wohärä dses geit, aber i weiss das deheimä dert isch,
wo di koffer umästeit und nid dert wo mä di kennt,
dert wo mä di verachtet,
für aues wo de vorhesch und aues wo de gmacht hesch,
deheim isch wo de glacht hesch happy mit dir säuber,
und nid definiert dür abgsperrti fäuder,
i la mi la leitä vo dä farbä a dä muurä a dä züg und a dä brüggä,
wo si schmückä mit vergangenä gedankä und entwichä so dä schattä,
wo si setzä zum mi brämsä und zum deckä vo dä lampä wo mi leitä,
irgendwenn bini deheim i bruchä gar kes billiet,
u wermä mini ufgschürftä füess amnä cheminée,
i bi gar nid verlorä vor was han ig mi gfürchtet,
grännä lislig mit mir säuber, fuck bini glückläch

la mi la ga la mi la zie, i bi säubschtständig,
und i weiss es o wenns nid seisch, ig bi dr eigentläch egau,
la mi la ga la mi la zie, i bi säubschtständig,
und i weiss es o wenns nid seisch, ig bi dr eigentläch egau

du hesch mir dr rüggä gchert, doch i stah glückläch da,
wöu ja o ä schönä rüggä entzückä cha,
la mi no la tröimä, denn i verwache gli,
mis deheim isch überau dert wo mini gedankä si,
auso machi d fänschter uf i mim gedankäschloss,
gseh üs beidi zämä u mir loufä richtig abärot,
und di warmä wort formä säch zu pflastersteinä,
wägwiser zeigä a mir si scho fasch deheimä,
und ischs di fauschi richtig, machsch paar schrittä zrügg,
mängisch muess mä rückwärts ga fürnä nöiä wäg,
und ischs dr würkläch wichtig, dass das itzä glückt,
de ligt dis deheimä scho i öinä händ,
und iz gisch mr no ä letschtä kuss uf d lippä
bevor dini umrissä i dr luft verschwindä,
z letschtä woni gseh, isch dis lächlä, guet,
i mache d ougä uf u mini fänschter zue

la mi la ga la mi la zie, i bi säubschtständig,
und i weiss es o wenns nid seisch, ig bi dr eigentläch egau,
la mi la ga la mi la zie, i bi säubschtständig,
und i weiss es o wenns nid seisch, ig bi dr eigentläch egau